ललितपुरः नेपालको एक मात्र ललितपुरको जावलाखेलमा रहेको सदर चिडियाखानामा जेष्ठ नागरिक र फरक क्षमता भएका पर्यटकहरुका लागि जनावरहरुको अवलोकन गर्न सहजताका लागि ललितपुर महानगरपालिकाले सटल बस संचालन गर्ने भएको छ ।
राष्ट्रिय प्रकृति संरक्षण कोषले संचालन गर्दै आएको चिडियाखानामा आउने जेष्ठ तथा फरक शारिरिक क्षमता भएका पर्यटकहरुलाई संरक्षित जनावरहरु राम्रोसँग हेर्न सकुन् भन्ने उद्धेश्यले चालु आर्थिक बर्षकै केही महिना भित्रमा सटल बस सञ्चालन गर्ने ललितपुर महानगरपालिकाका मेयर चिरिबाबु महर्जनले जानकारी दिए ।
उनले चिडियाखानमा भित्र सञ्चालन हुने सटल बस कम्तीमा १५ सिट क्षमताको हुने उनले जानकारी दिए । सटल बस भएपछि चिडियाखानामा संरक्षण गरि राखिएका बाघ, भालु , चितुवा, एक सिँगे गैडा, जल गैँडा, मृग, निल गाई लगायतका जनावरहरु जेष्ठ नागरिक र फरक क्षमता भएका पर्यटकहरुले ३ पटकसम्म घुमी घुमी बसमै बसेर हेर्न सक्ने मेयर महर्जनले बताए ।
बसमा रहने चालकले जनावरहरु भएको स्थानमा केही समय होल्ड गर्ने अनि मात्र अर्को सेक्सनका लागि अगाडि बढ्ने उनले बताए । सटल बस सञ्चालनका लागि रुट अध्ययनको काम सकिएको उनले जानकारी दिए ।
एउटा महानगर स्मार्ट सिटीका रुपमा विकास हुनका लागि चिडियाखानामा पनि अनिर्वाय भएकाले नेपालकै पहिलो नगरपालिकाका रुपमा स्थापित ललितपुरले नेपालमै एक मात्र सदर चिडियाघर पाउनु नै महत्वपूर्ण भएको मेयर महर्जनले बताए ।
उनले राज्यभिषेक हुनु अघि सदर चिडियाखाना प्रवेश गर्ने स्थानमा बाघका मुर्ती दुई साईडमा राखिएको प्रवेश गेट भएपनि भत्काइएको जनाउँदै अब महानगरले सोही स्थानमा बाघकै मुर्ती राखेर प्रवेश गेट निर्माण गर्ने योजना अगाडि बढाएको जानकारी पनि दिए । बाघको मुर्ति सहितको गेट बनाएपछि सदर चिडियाखाना आउने आन्तरिक तथा बाह्य पर्यटकहरुलाई गेट देख्नसाथ म अब सदर चिडियाखाना नजिक आईपुगे भन्ने भाव पैदा हुने उनले बताए ।
चिडियाखाना आउँदा अगाडिको सडक दायाँ वायाँ खुलेका पसल र चलिरहेको व्यपारले पर्यटकहरुको आगमनलाई असर पारिरहेकाले त्यसलाई व्यवस्थित गर्न महानगर तत्काल लागि पर्ने मेयर महर्जनले बताए ।
गर्ने भनेपछि तत्काल काम गरिहाल्ने आफ्नो बानी भएको जनाउँदै उनले आफु महानगरको मेयर सदर हुँनसाथ चिडियाखानाको गेट अगाडि हुने कन्सर्ट जस्ता कार्य सदाका लागि बन्द गराएको बताए । उनले भने ‘म मेयर हुनुभन्दा अगाडि ठूलठूला आवजमा यहाँ सांगेतिक कार्यक्रम हुने गरेको थियो । अनियन्त्रित साउण्डका कारण चिडियाखानमा बाघ भालु लगायतका जनवार रातभर सुत्न नै सकेका थिएनन् । बन्द गरेपछि हिजो आज उनिहरु आन्नदले रातभर निदाँउन पाएका छन् ।’
उनले सदर चिडियाखाना भित्र ठूलो पोखरी रहेको बताउँदै सोही पोखरीका कारण चिडियाखाना बाहिर पश्चिमतर्फ रहेका २ वटा ढुङ्गे धारामा अबिरल पानी आईरहेको बताए । पानीको स्रोत संरक्षणका लागि पनि चिडियाखानालाई थप व्यवस्थित गर्ने कुरामा महानगर गम्भिर रहेको उनले बताए । पोखरीको संरक्षण कसरी अन्नतकालसम्म गर्न सकिन्छ भन्ने चिन्ता महानगरले बढाएको उनले बताए । महानगरले आफ्ना पालिका भित्र रहेका ढुङ्गेधाराको खोजी र संरक्षणका लागि अनेकौ योजनाहरु ल्याएपनि सोचे अनुसारको प्रगति गर्न नसकेको उनले बताए ।
उनले चिडियाखानमा रहेका बाघ लगायतका अन्य जनावरहरुको संरक्षणका लागि आवश्यक पर्ने आहारा व्यवस्थापनमा महानगरले गरिररहेको सहयोगलाई निरन्तरता दिने बताए ।
सदर चिडियाखानाको स्थापना विसं १९८९ मा तत्कालिन प्रधानमन्त्री जुद्ध शमसेरले निजि चिडियाखानाको रूपमा स्थापना गराएका थिए । यो १९५० मा नेपाल सरकारले आफ्नो स्वामित्वमा लिएको थियो तर १९५६ मा मात्र यो सर्वसाधारणको लागि खुल्ला गरिएको थियो ।
Discussion about this post