एनएफमा खुला सचिव पदमा उम्मेदवारी दिने को हुन्, शैलेन्द्र चौधरी ?

काठमाडौं: नेपाल वन प्राविधिक सङ्घको आसन्न निर्वाचनमा प्रगतिशील वन प्राविधिक सङ्घ (PFAN) र मधेशका लागि वन (FFM) को संयुक्त प्यानलबाट शैलेन्द्र चौधरीले सचिव पदमा (खुल्ला) उम्मेदवारी दिएका छन् । नेपाल वन प्राविधिक संघको चैत्र २४ गते हुने निर्वाचनमा प्रगतिशील वन प्राविधिक संघ र मधेसका लागि वनले संयुक्त प्यानल बनाएर चुनाव लड्ने भएसँगै चौधरीले सचिव पदमा उम्मेदवारी दिएका हुन् । 

वन संवर्द्धन प्रणालीमा आधारित वन व्यवस्थापन, संरक्षित वन्यजन्तु र जलाधार, वातावरणीय सेवा भुक्तानी र जलवायु न्याय, सुदृढ वन संगठन संवृद्धि र विकासको आधार भन्ने नारासहित संयुक्त प्यानलले नेपाल वन प्राविधिक संघको पूर्वउपाध्यक्ष, भूसंरक्षण विभागको पूर्वमहानिर्देशक विजयराज पौड्याललाई अध्यक्षको उम्मेदवार बनाएको छ । त्यस्तै, उपाध्यक्षमा सुजितकुमार झा, खुल्ला महासचिव अजयविक्रम मानन्धर र महिला महासचिवमा मञ्जु घिमिरेलाई उम्मेदवार बनाएको छ भने  खुल्ला सचिव र महिला सचिवमा शैलेन्द्र चौधरी र करुणा कार्की तथा कोषाध्यक्ष लक्ष्मणप्रसाद पौड्याल उम्मेदवार बनाएको छ । संयुक्त प्यानलले वन प्राविधिकहरूको हित रक्षा, क्षमता वृद्धि, पारिस्थितिकीय पद्धति अक्षुण्ण राख्न र रोजगारी सिर्जनाका लागि नेपाल वन प्राविधिक संघको १० वर्षे रणनीति तथा कार्य योजनालाई अन्तिम रूप दिई कार्यान्वयनमा ल्याउने प्रतिबद्धता व्यक्त गरेको छ । 

को हुन् शैलेन्द्र चौधरी ?

मधेशको थारु समुदायबाट एक मात्र उम्मेदवार चौधरी ईश्वरपुर न.पा.०९, रामनगर (साबिक ईश्वरपुर गा.वि.स.-०८, रामनगर), सर्लाहीका हुन् । IOF, Hetauda बाट आइ.एस.सी. फरेष्ट्री (वि.सं.२०६४-२०६६), बि. एस. सी. फरेष्ट्री (वि.सं.२०६६-२०७०) गरेका चौधरी वि.सं.२०६५ को स्व.वि.यु. निर्वाचनमा सबै उम्मेदवारभन्दा बढी मत ल्याई सदस्य पदमा विजय भएका थिए । 

स्व.वि.यु.मा रही वि.ए.सी. प्रवेश परीक्षाको तयारी कक्षा सञ्चालनमा मनग्ये योगदान पुर्‍याएका चौधरी TU र AFU को विवाद भएको समयमा AFU मा अध्ययनरत विद्यार्थीहरू विचलित भएको अवस्थामा समेत अध्ययन-अध्यापनको लागि सरोकारवालाहरूको सल्लाह सुझाव लिई अध्ययन अध्यापन सुचारु गर्न स्व.वि. यु. को. तर्फबाट प्रमुख भूमिका खेलेका व्यक्ति समेत हुन् । 

शैक्षिक सुधार, पुस्तकालय व्यवस्थापन, होस्टेल व्यवस्थापन जस्ता विषयहरूमा आवाज उठाई सुधारमा सक्रिय भूमिका रहेको चौधरीले स्व.वि.यु. खेलकुद सप्ताह सम्पन्न  गर्नमा मुख्य भूमिका निर्वाह गरेका थिए । कलेजको सम्पूर्ण कर्मचारी, शिक्षक, शिक्षिका, विधार्थीहरूसँग मिलनसार व्यवहार गर्ने चौधरीको असल छविका कारण वनकर्मीहरूमाझ उनी सुपरिचित छन् ।

वि.सं.२०७०-२०७२ सम्म वन तथा भू-संरक्षण विभाग अन्तर्गत जिल्ला वन कार्यालयमा आबद्ध रहेका चौधरीले दाङमा रा.प. अनं. प्रथम श्रेणी (रेन्जर) पदमा कार्यरत रही दाङ जिल्लाको दुर्गम क्षेत्र गढवा, राजपुर र बेला गा. वि. स.को क्षेत्रमा रही वन तथा वन्यजन्तुको संरक्षण, वन पैदावार चोरिनिकासी नियन्त्रणमा सक्रिय भूमिका निर्वाह गरेका थिए । यसैगरी, वन अतिक्रमण नियन्त्रण तथा हटाउने कार्यमा, मुद्दा अनुसन्धान तथा तहकिकात, सामुदायिक वन उपभोक्ता समूहहरूलाई प्राविधिक सहयोग लगायतका कार्यहरूमा पनि उनको सक्रिय उपस्थिति देख्न सकिन्छ ।  

यसैगरी, वि.सं. २०७२ मा रा.प. तृतीय श्रेणीमा सहायक संरक्षण अधिकृत पदमा नियुक्त भएसँगै चौधरीले राष्ट्रिय निकुञ्ज तथा वन्यजन्तु संरक्षण विभागमा अन्तर्गत २०७२-२०७६ सम्म शुक्लाफाँटा राष्ट्रिय निकुञ्जमा रही वन्यजन्तु र तिनको वासस्थानको संरक्षण, व्यवस्थापन गरि मुख्य प्रजातिहरू जस्तै: बाह्रसिङ्गा, बाघ, गैँडा, कृष्णसारहरूको सङ्ख्या वृद्धि गराउने कार्यमा योगदान पुर्याएका थिए । त्यस भूमिका रहँदा चौधरीले वन्यजन्तुहरूको गणना, अनुगमन जस्ता कार्यमा समेत सक्रिय भूमिका खेलेका थिए । 

यसैगरी, नयाँ प्रविधि ‘जासुस क्यामेरा’को माध्यमबाट निगरानी गरि वन पैदावार र वन्यजन्तुहरूको चोरी निकासी नियन्त्रणमा भूमिका खेलेका चौधरीको मध्यवर्ती सामुदायिक वन उपभोक्ता समूहहरूलाई प्राविधिक सहयोग गर्ने, जनचेतना फैलाई मानव वन्यजन्तु द्वन्द्व न्यूनीकरणमा सहयोग पुर्‍याउने, शुक्लाफाँटा राष्ट्रिय निकुञ्ज कार्यालय अन्तर्गतका समूहमा आधारित चोरी शिकारी नियन्त्रण इकाईहरू रहेकोमा सञ्जाल निर्माण लगायतका कार्यहरूमा संलग्न रहेको लोभलाग्दो विगत रहेको छ ।

२०७६-२०७८ सम्म दुर्गम संरक्षित क्षेत्रहरू मध्यको एक खप्तड राष्ट्रिय निकुञ्जमा रही कामकाज गरेका चौधरीले सो क्षेत्रका दुर्गम भन्दा दुर्गममा रहेका सामुदायिक वन उपभोक्ता समूहमा प्राविधिक सहयोग एवं वन पैदावार र वन्यजन्तुहरूको चोरी निकासी नियन्त्रणमा सक्रिय भूमिका खेलेका थिए ।

२०७८ सालदेखि राष्ट्रिय निकुञ्ज तथा संरक्षण विभाग हुँदै वन तथा वातावरण मन्त्रालयमा रही कामकाज गर्दै आइरहेको चौधरी हाल सङ्घीय वन तथा वातावरणमन्त्रीको निजी सचिवालयमा कार्यरत छन् ।  वन तथा वातावरण मन्त्रीको निजि सचिवालयमा भएका कारण वन र वन प्राविधिकहरूको समस्याहरू मन्त्रीसमक्ष सहजै पुर्‍याउन र समस्याको समाधान गर्न चौधरी सक्षम देखिन्छन् ।