नेपाल आर्ट काउन्सिलमा हिमालयन आर्ट फेस्टिभल हुँदै

काठमाडौं: यही मिति २०८० साल भदौं ७ गतेदेखि १३ गतेसम्म नेपालकै सबैभन्दा स्तरीय र बृहत कला प्रदर्शनी नेपाल आर्ट काउन्सिलमा हुन् गइरहेको छ । हिमालयन आर्ट फेस्टिभल नाम दिइएको उक्त प्रदर्शनी ई–आर्टस् नेपालले सन् २०१७ देखि निरन्तर रुपमा हरेक वर्ष नेपालीहरूको महान् चाड दशैंको अवसर पारेर आयोजना गर्दै आइरहेको छ ।

ई–आर्टस् नेपालका सह—संस्थापक आशा डङ्गोल हिमालयन आर्ट फेस्टिभलको विषयमा यसरी बताउँछिन्, ‘दशैंमा धेरै मेलाहरूको आयोजना भइरहेको हुन्छ । नेपाली कलाको कमि थियो, त्यहि अवस्थालाई मनन् गर्दै नेपाली कलाकारहरूको समकालिन अवस्था र प्रोत्साहनका साथ सन् २०१७ देखि यो फेस्टिभलको आयोजना गर्दै आइरहेका छौँ ।’

नेपाली कलाकृति नेपालीहरूकै घरमा सजिउन् भन्ने उद्देश्य पनि यस प्रदर्शनीले बोकेको कुरा कलाकार डंगोल बताउँछिन् । पहिला पहिला नेपाली कलाकृति किन्न गाह्रो हुन्छ भन्ने थियो, तर अहिले आकर्षक मूल्यमा मध्यम वर्गिय परिवारलाई लक्षित गरी यस कला प्रर्दशनी गर्न लागिएको हो । करिब ८० भन्दा बढी कलाकारहरूले आफ्नो कला प्रदर्शनीमा राखेका छन् ।

नेपाली कलाकारहरूको कलाको स्तर मापनको लागि समेत यस प्रदर्शनीले महत्त्वपूर्ण भूमिका खेल्ने समेत सहभागी कलाकारहरू बताउँछन् । किनकी यस प्रदर्शनीमा नेपालका कलाक्षेत्र कुन ठाउँमा छ भनेर बुझ्न समेत यस प्रदर्शनीले मद्दत गर्दछ । कलाको विकासलाई हेर्ने आधार समेत यसले तय गर्न सक्छ ।

सन् २०१७ मा समसामयिक चित्रकला र मुर्तिहरूबाट सुरु गरिएको यस फेस्टिभलमा जम्मा ५० जना कलाकारहरूले भाग लिएका थिए । त्यसपछि २०१८ देखि काठमाडौं उपत्यकामा रहेका कलाकारहरूका विभिन्न संस्थाहरूसँग कुराकानी गरेर उनीहरूको सहयोग लिँदै थप कलाकारहरू थप्दै गएको कलाकार डंगोल बताउँछिन् ।

यहि कारणले गर्दा पनि यो कला प्रदर्शनी एक बृहत् सामूहिक मेलाको रुपमा वर्षेनी आयोजना भइहरहेको छ । अहिले हुने प्रदर्शनीमा कलाका विभिन्न विधालाई समेटिएको छ । नेपाली बरिष्ठ कलाकारहरू देखि वर्तमानका पुस्ताका कलाकारहरूको कामलाई प्रदर्शनीमा राखिएको छ । विधागत हिसाबले हेर्ने हो भने, ‘टु डी’ र ‘थ्री डी’ डाइमेन्सनका कलाहरू यस प्रदर्शनीमा समावेश गरिएका छन् ।

कलाकारहरू: कृष्ण मानन्धर, किरण मानन्धर, शशिकला तिवारी, राजन काफ्ले, आशा डंगोल, एरिना ताम्राकार, भाइराज मर्हजन, प्रदिप बज्राचार्य, प्रमिला बज्राचार्य, विनोद प्रधान, विधाता के.सी, सागर मानन्धर, उजय बज्राचार्य, सरिता डंगोल आदि देखि हालका युवा कलाकारहरूमा इशान परियार, सविता डंगोल, सुजन डंगोल लगायत करिब ८० जना कलाकारहरूको कलाकृति एउटै थलोमा हेर्न सकिन्छ ।

प्रदर्शनीको अर्को आकर्षण भनेको एक जना वरिष्ठ कलाकारलाई एउटा छुट्टै स्थान बनाएर उनको कलाकृतिलाई त्यहाँ राखिने कार्यक्रम समेत सन् २०१९ देखि गर्दै आइरहेको ई–आर्ट्स नेपालका सह—संस्थापक भाइराज मर्हजन बताउँछन् । यसपाली भने उक्त स्थानमा कलाकार वरिष्ठ मूर्तिकार प्राध्यापक गोविन्दनारायण ज्यापुका कलाकृतिलाई प्रदर्शनीमा राखिने जानकारी समेत उनले गराए ।

हिमाल, पहाड, तराइका कलाकारहरूको सहभागिता यस प्रदर्शनीमा रहेको छ । महिला कलकारहरूको समेत उल्लेख्य सहभागिता रहेको यस प्रदर्शनीमा सहभागी अर्की कलाकार तथा ई–आर्ट्स नेपालका सह—संस्थापक एरिना ताम्राकारले बताइन् ।

कार्यक्रमको उद्घाटन वरिष्ठ मूर्तिकार प्राध्यापक गोविन्दनारायण ज्यापुले गर्ने कार्यक्रम रहेको छ । सात दिनसम्म चल्ने प्रदर्शनीका बिचमा विभिन्न क्रियाकलापहरू समावेश गरिएको छ । जसमा उद्घाटनको दिन बेलुकी ५ बजे प्राध्यापक गोविन्द नारायण ज्यापुलाई लाई सम्मान गरिनेछ । प्रदर्शनीका दौरानमा प्रतिमा थकालीले कला प्रदर्शनीको भ्रमण गराउने कार्यक्रम रहेको छ भने कलाको विषयमा कुराकानी पनि हुनेछ । जसमा प्यानल छलफल हुने आयोजकले जनाएको छ । प्रदर्शनीको दौरान कलाकार प्रशान्त श्रेष्ठको सम्झनामा राखिएको प्रशान्त छात्रवृत्ति समेत तिनजना युवा कलाकारहरूलाई वितरण गरिने छ ।

कार्यक्रमको तालिका
भाद्र ७ २०८० (अगस्ट २४, २०२३ )
समयः बेलुकी ५ बजे ।
कार्यक्रमको उद्घाटन तथा प्राध्यापक गोविन्द नारायण ज्यापुलाई सम्मान कार्यक्रम
भाद्र ९, २०८० (अगस्ट २६, २०२३)
प्रतिमा थकालीद्वारा कला प्रदर्शनीको भ्रमण गराउने
समयः दिउँसो २ बजे ।

भाद्र १०, २०८० (अगस्ट २७, २०२३)
आर्ट टक: प्यानल डिस्कसन
सञ्चालकः सजन श्रेष्ठ
(प्यानलिस्टः प्रतिमा पाण्डे, सौरभ ज्योती, प्रज्ज्वल शाक्य)
समयः दिउँसो ३ बजे
भाद्र १२, २०८०, (अगस्ट २९, २०२३)
प्रशान्त छात्रवृत्ति पुरस्कार वितरण कार्यक्रम
समयः बेलुकी ४ बजे ।
भाद्र १३, २०८० (अगस्ट ३०, २०२३)
कार्यक्रम समापन