ललितपुर- नेपाली महिला मिडफिल्डर रेणुका नगरकोटे क्षेत्रप्रताप अधिकारी युवा प्रोत्साहन पुरस्कार– २०८१ बाट सम्मानित भएकी छिन्। गुरुकुल एजुकेसनल फाउन्डेसन नेपालद्वारा आयोजित NCM DAY कार्यक्रममा उक्त पुरस्कार प्रदान गरिएको हो।
रेणुका ५० हजार रुपैयाँ नगदसहित सम्मानित भएकी हुन्।
पुरस्कार घोषणा कार्यक्रममा अमनप्रताप अधिकारीले रेणुका नगरकोटेलाई ‘Unsung Hero’ को रूपमा सम्मान गर्दै भने, ‘उनले खेलकुद मैदानमा देखाएको प्रदर्शन होस् वा जीवनको कठिन संघर्ष, दुवै कुराले आगामी पुस्तालाई ठुलो प्रेरणा दिएको छ।’
कार्यक्रममा नेपाल कलेज अफ म्यानेजमेन्टका कलेज प्रिन्सिपल प्रा.डा. सुशीलभक्त माथेमाले पनि रेणुकालाई बधाई दिँदै भने, ‘उहाँको खेलजीवन अझ ऊर्जावान बनोस् भन्ने शुभकामना छ।’
रेणुकाले पनि यस सम्मान आफ्नो लागि महत्त्वपूर्ण रहेको बताउँदै भनिन्, “म पहिले पनि त्यसैगरि खेल्दथें, जसरी आज खेल्दै आइरहेको छ। अमन प्रताप सरले नोटिश गरिदिनुभएपछि अरूले पनि नोटिश गर्न थालेँ”, उनले अगाडि भनिन्, “मेरो १८ वर्ष लामो खेल जीवनमा पहिलोपटक यस्तो सम्मान पाएकी छु। त्यसैले यो सम्मान मेरो लागि निकै महत्त्वपूर्ण छ।”
रेणुका नगरकोटेले नेपाली महिला फुटबलको मिडफिल्डबाट खेल्दै आएका अनेकौँ प्रतिस्पर्धामा उल्लेखनीय योगदान दिएकी छिन्।
खेलकुदको समाजमा तथा खेलप्रेमीहरूले कम चर्चा पाइरहेकी प्रतिभाको पहिचान गर्दै उनलाई पुरस्कृत गर्नुलाई आयोजक संस्थाको प्रेरणादायी कदमको रूपमा हेरेको छ।
यसैगरी कवि क्षेत्र प्रताप अधिकारी युवा साहित्य पुरस्कार २०८१ बाट सिजन श्रेष्ठ पुरस्कृत भए । उनको कविता संगह ‘हावामा अल्झिएको स्वर’ ले उक्त पुरस्कार पाएको हो ।
उनले पनि नगद ५० हजारसहित सम्मान पत्र प्राप्त गरे ।
Discussion about this post